Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (81) Յունիս 2018

Կիպրահայ

Կիպրոսի պատուիրակութիւնը յարգանքի տուրք մատուցեց Հայոց Ցեղասպանութեան զոհերու յիշատակին


Կիպրոսի Հանրապետութեան ներկայացուցիչներու տան նախագահ Տիմիթրիս Սիլուրիսի գլխաւորած պատուիրակութիւնը 22 Մայիսին այցելեց Ծիծեռնակաբերդի յուշահամալիր` յարգանքի տուրք մատուցելու Հայոց ցեղասպանութեան զոհերու յիշատակին:
Հայաստանի Հանրապետութեան Ազգային ժողովի փոխնախագահ Էդուարդ Շարմազանովի ուղեկցութեամբ Կիպրոսի ներկայացուցիչները ծաղկեպսակ դրին Հայոց ցեղասպանութեան զոհերու յիշատակը յաւերժացնող յուշարձանին եւ ծաղիկներ խոնարհեցին անմար կրակին մօտ:
Հայոց ցեղասպանութեան թանգարան-հիմնարկի տնօրէնի պաշտօնակատար Գէորգ Վարդանեան ներկայացուց յուշահամալիրի կառուցման պատմութիւնը եւ յուշակոթողի խորհրդանշական իմաստը:
Կիպրոսի Հանրապետութեան ներկայացուցիչներու տան նախագահ Տիմիթրիս Սիլուրիսը նշեց, որ Հայոց ցեղասպանութեան ճանաչումը Թուրքիոյ եւ ամբողջ աշխարհի կողմէ, ինչպէս եւ իւրաքանչիւր ցեղասպանութեան ճանաչումը պատմական նշանակութիւն ունի` ապագային նման դէպքերէն խուսափելու համար:
«Ասիկա է հայերու պայքարը: Մենք միշտ հայերու կողքին պիտի ըլլանք ո՛չ միայն իբրեւ բարեկամներ եւ եղբայրներ, այլեւ իբրեւ պետութիւն: Ատիկա պարտաւորութիւն մըն է ո՛չ միայն հայերու նկատմամբ, այլեւ ամբողջ մարդկութեան, որպէսզի երբեք ցեղասպանութիւններ չկրկնուին», ըսած է Սիլուրիս:
Կիպրոսի ներկայացուցիչները շրջապտոյտ կատարեցին նաեւ Հայոց ցեղասպանութեան թանգարանին մէջ եւ ծանօթացան Ցեղասպանութեան մասին վկայող նիւթերուն: Վերջաւորութեան պատուիրակութեան անունէն գրառում կատարուեցաւ.
«Մենք կրկին տեսանք հայ ժողովուրդի տառապանքները բարբարոսութեան եւ ատելութեան մէջ. մենք կ՛ըսենք` այլեւս երբեք»:
Կիպրոսը Հայոց ցեղասպանութիւնը ճանչցած ու դատապարտած առաջին պետութիւններէն է: Ան բանաձեւեր ունի 1975, 1982, 1990 թուականներուն, ինչպէս նաեւ անիկա առաջին պետութիւնն է, որ բարձրացուցած է Հայոց ցեղասպանութեան հարցը ՄԱԿ-ի Ընդհանուր ժողովին մէջ: Կիպրոսը ունի նաեւ Հայոց ցեղասպանութեան ժխտումը քրէականացնող օրէնք` ընդունուած 2 ապրիլ 2015-ին: