Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (85) Նոյեմբեր 2018

Անցուդարձ

Նիկոլ Փաշինեանի պաշտօնական այցը Լիբանան
"Վերջին ամիսներուն՝ մեր ժողովուրդի կեանքին, յատկապէս Հայաստանի մէջ սիրոյ եւ համերաշխութեան նոր էջ բացուեցաւ». ԱՐԱՄ Ա.


Վարչապետի պաշտօնակատար Նիկոլ Փաշինեանի գլխաւորած պատուիրակութիւնը Հոկտեմբեր 20-ին, երկօրեայ աշխատանքային այցով Լիբանան գացած է:
Այցին առաջին օրը Փաշինեան հանդիպումներ ունեցած է նախագահ Միշէլ Աունի, վարչապետ Սաատ Հարիրիի, խորհրդարանի նախագահ Նեպիհ Պըրրիի հետ։ Նոյն օրը Փաշինեան Հայաստանի Պէյրութի դեսպանատան մէջ տեսակցած է աւանդական հայ քաղաքական կուսակցութիւններու՝ ՀՅԴ-ի, ՍԴՀԿ-ի եւ ՌԱԿ- ներկայացուցիչներուն հետ: ՀՀ վարչապետի պաշտօնակատարը կարեւոր նկատած է Լիբանանի աւանդական հայ կուսակցութիւններու հետ հանդիպումը` Հայաստանի զարգացման, Հայաստան-Սփիւռք-Արցախ կապերու սերտացման եւ համահայկական օրակարգի հարցերը քննարկելու առումով: Ան ընդգծած է իր առանձնայատուկ ուշադրութիւնը Լիբանանի Հայութեան եւ երիտասարդութեան նկատմամբ` շնորհակալութիւն յայտնելով Թաւշեայ յեղափոխութեան ժամանակ անոնց աջակցութեան եւ յստակ դիրքորոշման համար:
ՀՅԴ-ի, ՍԴՀԿ-ի եւ ՌԱԿ-ի ներկայացուցիչները ընդգծած են, որ անհրաժեշտ է պահպանել ժողովրդական միասնութեան ոգին` շեշտելով ՀՀ քաղաքական ուժերուն միջեւ երկխօսութիւնը շարունակելու կարեւորութիւնը` ի շահ Հայաստանի յառաջընթացին: Անոնք իրենց աջակցութիւնը յայտնած են Նիկոլ Փաշինեանին ու ՀՀ կառավարութեան՝ նոր Հայաստանի զարգացման տեսլականը կեանքի կոչելու գործին մէջ:
ՀՀ վարչապետի պաշտօնակատարը նաեւ հանդիպում ունեցած է «Ազդակ», «Արարատ» օրաթերթերու խմբագրապետերուն եւ «Սեւան», «Վանայ ձայն» ձայնասփիւռներու տնօրէններուն հետ:
Նոյն օրը նոյնպէս Հայաստանի դեսպանատան մէջ Փաշինեան հանդիպում ունեցած է նաեւ Լիբանանի հայ համայնքի ներկայացուցիչներուն հետ:
Իր ելոյթէն ետք՝ Փաշինեան պատասխանած է ներկաներու շարք մը հարցումներուն, որոնք կը վերաբերէին Հայաստանի զարգացման, Հայաստան-Սփիւռք կապերու սերտացման, ոլորտային բարեփոխումներուն, ՀՀ տնտեսական զարգացման առաջնահերթութիւններուն, հայրենադարձութեան, Պետութիւն-Եկեղեցի համագործակցութեան եւ այլն:
Փաշինեան մասնակցած է
Մեծի Տանն Կիլիկիոյ Արամ Ա. Կաթողիկոսի
ձեռնադրութեան 50-ամեակին նուիրուած պատարագին:
Փաշինեան Լիբանան կատարած աշխատանքային այցի ծիրին մէջ Հոկտեմբեր 21-ին իր տիկնոջ՝ Աննա Յակոբեանի հետ այցելած է Անթիլիասի մայրավանքի Ս. Գրիգոր Լուսաւորիչ մայր տաճար, ուր մասնակցած է Մեծի Տանն Կիլիկիոյ Արամ Ա. կաթողիկոսի ձեռնադրութեան 50-ամեակին նուիրուած պատարագին: Արարողութեան ներկայ եղած են նաեւ Լիբանանի նախագահի, կառավարութեան եւ խորհրդարանի ներկայացուցիչներ:
Արամ Ա. իր խօսքին մէջ նշած է. "Վերջին ամիսներուն՝ մեր ժողովուրդի կեանքին, յատկապէս Հայաստանի մէջ սիրոյ եւ համերաշխութեան նոր էջ բացուեցաւ եւ ես վստահ եմ, որ այս սիրոյ ու համերաշխութեան էջը նաեւ պիտի դառնայ ազգային միասնականութեան էջ, մեր ժողովուրդի բոլոր զաւակներու ամբողջական յանձնառութեամբ ու մասնակցութեամբ Հայաստանի վերաշինութեան սրբազան առաքելութեան։ Մեծի Տանն Կիլիկիոյ Կաթողիկոսութիւնը, պարոն վարչապետ, պիտի շարունակէ վերանորոգ նուիրումով ու հաւատքով իր ամբողջական մասնակցութիւնը բերել Հայաստանի հզօրութեան, Արցախի ամրապնդման ձգտող բոլոր աշխատանքներուն"։ Պատարագէն յետոյ Նիկոլ Փաշինեան հանդէս եկած է Արամ Ա. կաթողիկոսին ուղղուած շնորհաւորական խօսքով: