Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (81) Յունիս 2018

Անցուդարձ

Արցախի մէջ բարձրաստիճան պաշտօնեաներ հրաժարական ներկայացուցած են եւ նորեր նշանակուած են

7 Յունիսին Արցախի մէջ իրենց հրաժարականները ներկայացուցին Արցախի պետական նախարար Արա Յարութիւնեան, Ազգային անվտանգութեան ծառայութեան պետ Արշաւիր Ղարամեան եւ ոստիկանապետ զօրավար-գնդապետ Կամօ Աղաջանեան:
Անոնց փոխարէն, Արցախի նախագահ Բակօ Սահակեանի կողմէ հրապարակուած հրամանագիրներով Արցախի պետական նախարար նշանակուած է Գրիգորի Մարտիրոսեան, որ մինչ այդ Արցախի ելեւմուտքի նախարար էր, գնդապետ Իգոր Գրիգորեան նշանակուած է Արցախի Հանրապետութեան ոստիկանութեան պետ, գնդապետ Սամուէլ Շահրամանեան` Ազգային անվտանգութեան ծառայութեան տնօրէն, իսկ Արթուր Յարութիւնեան` Արցախի ելեւմուտքի նախարար:
Իր հրաժարականը ներկայացնելէ քանի մը ժամ ետք տուած մամլոյ ասուլիսին ընթացքին պետական նախարար Արա Յարութիւնեան յայտարարած է, որ իր հրաժարականը կապուած չէ ցուցարարներուն պահանջին` աւելցնելով, որ, բայց եւ այնպէս երիտասարդ դէմքերու կարիք կայ:
Ըստ անոր, հանրութեան մէջ ձեւաւորուած պահանջ եւ տրամադրութիւն կայ` երկրին մէջ բարեփոխումներու նոր փուլ իրականացնելու: «Վերջին քանի մը ամիսներուն, մանաւանդ Հայաստանի մէջ կատարուած իշխանափոխութենէն ետք, Արցախի ժողովուրդին մէջ եւս ձեւաւորուեցաւ փոփոխութիւններ կատարելու պահանջ», ըսած է Յարութիւնեան` միեւնոյն ժամանակ յայտարարելով, որ պիտի չհրաժարի քաղաքականութենէն, այլ պիտի շարունակէ ղեկավարել իր կուսակցութիւնը: «Կ՛ուզեմ աւելի ազատ քաղաքական գործիչ ըլլալ, որպէսզի կարելիութիւն ունենամ հանրութեան կողմէ պահանջուած բարեփոխումներուն աւելի մեծ մասնակցութիւն բերել», պարզաբանած է ան:
Պատասխանելով այն հարցումին, թէ կրնա՞յ ըլլալ, որ իր հրաժարականը կապ ունի 2020-ին Արցախի մէջ կայանալիք նախագահական ընտրութիւններուն մասնակցութեան` Ա. Յարութիւնեան ըսած է. «Արցախի մէջ ամէն բան կարելի է 50 տոկոսով, որովհետեւ այստեղ ամէն պահու սահմանագիծին վրայ կրնան արձանագրուիլ լուրջ փոփոխութիւններ, որոնք կը փոխեն մեր ամբողջ օրակարգը»:
«Վերջին ամսուան ընթացքին նախագահին հետ կը քննարկէինք, թէ կարիք կայ ինչպիսի՛ բարեփոխումներու, որոնք հանրութեան վստահութիւն կը ներշնչեն: Այդ քննարկումներուն առանցքը հանդիսացաւ մարդուժի լուրջ փոփոխութիւններու հարցը», ըսած է հրաժարեալ պետական նախարարը:
Լրագրող մը հարցուցած է նախագահ Բակօ Սահակեանի հաւանական հրաժարականին մասին, իսկ Ա. Յարութիւնեան պատասխանած է. «Բակօ Սահակեան Արցախի սահմանադրութեան ու անվտանգութեան երաշխաւորն է, եւ նախագահի յաճախակի փոփոխութիւնը անիմաստ է, մանաւանդ որ անոր լիազօրութիւններուն ժամկէտը չէ աւարտած»:
Արա Յարութիւնեան նշած է, որ իր պաշտօնավարութեան ընթացքին Արցախի մէջ կատարուած են բազմաթիւ բարեփոխումներ, ժողովրդագրական աճ արձանագրուած է, նուազած են արտագաղթողները, ծնելիութիւնը աւելցած է: Անոր համաձայն, վերջին ամիսներուն Արցախի մէջ իրականացուած են վերաբնակեցման լուրջ ծրագիրներ, որոնք պէտք է շարունակուին:
Արցախի Հանրապետութեան ոստիկանապետ Կամօ Աղաջանեան եւս իր հրաժարականէն ետք ուղերձ յղած է արցախցիներուն` դիտել տալով, որ վերջին օրերուն տեղի ունեցած բողոքի ալիքը առիթ տուած է մտածելու, իսկ իր մտահոգութեան տուն տուող պատճառը իր հրաժարականին պահանջը չէր միայն, այլեւ երկրի ներքին ապահովութիւնը չխաթարելն ու երկիրը ներքաղաքական լարուածութենէ զերծ պահելը:
«1991-էն ես հող հայրենիի կանչով եւ ձեզմէ շատ շատերու օրինակով կամաւորագրուած եմ արցախեան ազատամարտին: Լեռնային Ղարաբաղի ինքնապաշտպանական ուժերու Ուխտաձորի ջոկատի հրամանատարէն հասնելով Հայաստանի պաշտպանութեան բանակի բանակային զօրախումբի հրամանատարի պատասխանատու, պաշտօնիս ամբողջ ծառայութեան ընթացքին սեփական կենսագրութեամբ ու օրինակով փորձած եմ ներկայացնել հայրենիքին հանդէպ գերագոյն նուիրումի դրսեւորումը: 25 մարտ 2013-էն մինչեւ օրս կը վարեմ ոստիկանութեան պետի պաշտօնը, իմ հիմնական նպատակս ու առաքելութիւնս կը նկատեմ ծառայել ժողովուրդիս, ստեղծել ու ամրապնդել լիարժէք վստահութեան մթնոլորտ ոստիկանութեան եւ հասարակութեան միջեւ:
«Թէ` որքան յաջողած եմ այդ առումով, կը ձգեմ ձեր դատին: Որքան ալ բարձրագոչ հնչէ, ինծի համար միշտ ամէնէն առաջնայինը եղած է ու կը շարունակէ մնալ արտաքին, ինչպէս նաեւ ներքին անվտանգութիւնը, ժողովուրդին խաղաղ կենսագործունէութեան համար բոլոր պայմաններու ապահովումը, որուն համար ոչինչ պարտաւոր ենք խնայել ու ոչ մէկ խոչընդոտի առջեւ կանգնիլ:
«Սիրելի՛ բարեկամներ, հաշուի առնելով իմ հրաժարականի ներկայացման վերաբերեալ հասարակութեան մէջ յառաջացած պահանջը, ոստիկանութեան պետի պաշտօնէն զերծ կացուցուելու զեկուցագիր ներկայացուցած եմ Արցախի Հանրապետութեան նախագահ Բակօ Սահակեանին: Կ՛ուզեմ հաստատել, որ այսուհետեւ եւս պիտի շարունակեմ հաւատարիմ մնալ Արցախի Հանրապետութեան պետականութեան ամրապնդման գործին եւ հայրենիքին սպառնացող իւրաքանչիւր վտանգի պարագային պատրաստ եմ սեփական օրինակով ապացուցել ատիկա: Եղած եմ ու կը մնամ հայրենիքիս զինուորը», եզրափակած է ոստիկանապետը: