Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (73) Հոկտեմբեր 2017

Անցուդարձ

Ժընեւի Մէջ Տեղի Ունեցաւ Հայաստանի Եւ Ատրպէյճանի Նախագահներուն Բանակցութիւնները

antsoutarts1aԵԱՀԿ Մինսկի խումբի համանախագահներուն նախաձեռնութեամբ, Ժընեւի ՄԱԿի գրասենեակի եւ այլ միջազգային կազմակերպութիւններու՝ Զուիցերիոյ մօտ մշտական ներկայացուցիչի կեցութեան վայրին մէջ տեղի ունեցաւ Հայաստանի Հանրապետութեան նախագահ Սերժ Սարգսեանի ու Ատրպէյճանի Հանրապետութեան նախագահ Իլհամ Ալիեւի հանդիպումը:
Հանդիպումը տեղի ունեցաւ երկու երկիրներու արտաքին գործոց նախարարներ Էդուարդ Նալբանդեանի եւ Էլմար Մամետեարովի, ինչպէս նաեւ ԵԱՀԿ Մինսկի խումբի համանախագահներ Իկոր Փոփովի (Ռուսիա), Էնտրու Շոֆըրի (Միացեալ Նահանգներ), Սթեֆան Վիսքոնթիի (Ֆրանսա) եւ ԵԱՀԿի գործող նախագահի անձնական ներկայացուցիչ Անճէյ Քասփըրչիքի մասնակցութեամբ։
Հանդիպումէն ետք տեղի ունեցաւ նախագահներուն առանձնազրոյցը:
ԵԱՀԿի մամլոյ ծառայութենէն կը տեղեկացնեն, թէ հանդիպումէն ետք յայտարարութիւն տարածած են ԵԱՀԿ Մինսկի խումբի համանախագահները եւ Հայաստանի ու Ատրպէյճանի արտաքին գործոց նախարարները:
Սոյն յայտարարութեան մէջ կ՛ըսուի.
«Հանդիպումը Ժընեւի մէջ անցաւ կառուցողական մթնոլորտին մէջ:
«Նախագահները պայմանաւորուեցան միջոցներ ձեռնարկել՝ աշխուժացնելու բանակցային գործընթացը եւ յաւելեալ քայլերու նախաձեռնել՝ թուլացնելու լարուածութիւնը շփման գիծին երկայքով:
Համանախագահները գոհունակութիւն յայտնեցին ուղիղ շփումներուն նկատմամբ, որ տեղի ունեցաւ երկար դադարէ ետք: Համանախագահները կը մնան պատրաստ աշխատելու կողմերուն հետ՝ հասնելու համար Ղարաբաղեան հակամարտութեան խաղաղ եւ բանակցուած լուծման: Որպէս յաջորդ քայլ՝ համանախագահները յառաջիկային պիտի կազմակերպեն աշխատանքային խորհրդակցութիւններ նախարարներուն հետ»:
Ժընեւի մէջ Զուիցերիոյ Համադաշնութեան մօտ Հայաստանի Հանրապետութեան դեսպանատան յարկին տակ, Նախագահ Սերժ Սարգսեան Երկուշաբթի, 16 Հոկտեմբերին, հանդիպում ունեցաւ նաեւ զուիցերիահայ համայնքի ներկայացուցիչներու հետ: Ան հանդիպման ընթացքին իր ներածական խօսքին մէջ նաեւ ներկայացուց Ատրպէյճանի նախագահին հետ բանակցութիւններուն արդիւնքները:
«Քանի մը վայրկեան առաջ Ատրպէյճանի նախագահին հետ հանդիպումը աւարտեցաւ. որեւէ յստակ համաձայնութիւն, այսպէս ըսած, չունինք հարցի լուծման տարբերակներուն մասին: Բայց համաձայնեցանք, որ միջոցներու ձեռնարկենք՝ լարուածութիւնը ալ աւելի թուլացնելու, որպէսզի առաջնագիծին վրայ չունենանք զոհեր: Պէտք է ըսեմ, որ ե՛ւ Ատրպէյճանի նախագահը, ե՛ւ ես խորապէս շահագրգռուած ենք ատով:
Տայ Աստուած, որ միշտ այդպէս կարծէ: Ան ալ շատ լաւ կը հասկնայ հարցին բարդութիւնը, բնականաբար, ես ալ, բայց խնդիրը այնպիսին է, որ հեշտ լուծում երբեք պիտի չըլլայ: Սակայն, մէկ հարցով ալ կ՛ուզեմ, որ բոլորդ վստահ ըլլաք՝ մեզի համար չկայ լուծում, որ կրնայ որեւէ կերպ սպառնալ Ղարաբաղի անվտանգութեան: Մեզի համար միակ լուծումը այն է, որ Ղարաբաղը ըլլայ Ատրպէյճանէն դուրս: Երբեք ոեւէ հայ ղեկավար չի կրնար ընդունիլ այդպիսի որոշում եւ զայն իրականացնել, եւ ատոր համար մենք ամէն ինչ պիտի ընենք՝ զուգահեռ զարգացնելով Հայաստանը, տնտեսապէս ամրապնդելով մեր երկիրը», ըսաւ Սարգսեան: