Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (67) Մարտ 2017

Անցուդարձ

Նախընտրական առաջին հարցախոյզին համաձայն՝ «Ծառուկեան» դաշինքը կը գերազանցէ ՀՀԿ-ին

antsoutarts1aԽորհրդարանական ընտրապայքարի առաջին օրերուն «Ծառուկեան» դաշինքը ետին ձգած է Հայաստանի Հանրապետական կուսակցութիւնը: Յամենայն դէպս, ա՛յդ ցոյց կու տան միջազգային Gallup International Association կազմակերպութեան կատարած հարցախոյզին արդիւնքները:
Ի պատասխան «եթէ ընտրութիւնները տեղի ունենային այս Կիրակի, ո՞ր կուսակութեան կամ դաշինքին ի նպաստ կը քուէարկէիք» հարցումին՝ հարցապնդուածներու 26,4%-ը պատասխանած է «Ծառուկեան» դաշինք-ին, իսկ 22,8%-ը նախընտրութիւնը տուած է ՀՀԿ-ին:
Gallup International Association-ի հայաստանեան ներկայացուցչութեան տնօրէն Արամ Նաւասարդեան յիշեցուցած է, որ կազմակերպութեան նոյեմբերեան հետազօտութեան համաձայն՝ ՀՀԿ-ի ի նպաստ քուէարկելու պատրաստ էր հարցապնդուածներու 19,5%-ը, իսկ «Ծառուկեան» դաշինքի կորիզը հանդիսացող «Բարգաւաճ Հայաստան»-ի ի նպաստ` 18,4%-ը:
"Հիմա մենք գտնւում ենք մեկնարկային իրավիճակում եւ ամենաբարձր արդիւնքներ ցոյց տուած երկու առաջատար քաղաքական ուժերի ցուցանիշերը 23% եւ 26% են։ Դրանք շատ չեն տարբերւում՝ ընդամէնը 3%-ով։ Քարոզարշաւը, որի վկաները կը լինենք առաջիկայ մէկ ամսում՝ շատ բան կարող է փոխել", յայտարարած է Նաւասարդեան:
Ընտրապայքարի միւս մասնակիցները զգալի կերպով կը զիջին քաղաքական այս երկու ուժերուն: Այսպէս, Փաշինեանի «Ելք» դաշինքին ի նպաստ պատրաստ է քուէարկելու հարցապնդուածներու 4,3%-ը, Հայ Յեղափոխական Դաշնակցութեան` 3,9%-ը, «Ազատ դեմոկրատներ»-ուն` 3,4%-ը, «Հայկական վերածնունդ»-ին` 2,7%-ը, «ՀԺԿ-Կոնգրէս»-ին՝ 2,6%-ը, «Օհանեան-Րաֆֆի-Օսկանեան» դաշինքին` 1,8%-ը եւ Կոմունիստական կուսակցութեան` 1%-ը:
Փետրուար 23-էն Մարտ 2 ժամանակահատուածին կատարուած այս հարցախոյզին մասնակցած է 1146 քաղաքացի` ամբողջ Հայաստանէն (վիճակագրական սխալի հաւանականութիւնը ± 3% է):